स्याङ्जाको गल्याङ नगरपालिका घर भएकी सीता भट्टराईका जुम्ल्याहा छोराछोरी थिए – दिपेश र दिपिका । पढाईसँगै अतिरिक्त क्रियाकलापमा पनि अब्बल रहेका दाजुबहिनी कक्षा १० अर्थात् एसईईको तयारीमा जुटेका थिए ।

यही बिचमा उनीहरु अनलाइनबाट फर्म भरेर नेपाल एस्ट्रोनोमिकल सोसाइटीको आयोजनामा हुने नेसनल एस्ट्रोनोमी ओलम्पियार २०२४ मा भाग लिन काठमाडौँ हिँडेका थिए । तर उनीहरूको यात्रा धादिङको धुनिवेशी नगरपालिका–९ स्थित झ्याप्ले खोलामा पुगेर एकसाथ सदाका लागि टुङ्गियो ।

पृथ्वी राजमार्गको नागढुंगा–नौबिसे सडक खण्डको झ्याप्ले खोलामा आएको पहिरोमा परी जुम्ल्याहा दाजु–बहिनी दिपेश–दिपिका, उनीहरूकी आमा सीता भट्टराई समेत पुरिएको खबर पुष्टि भएको छ ।