खोटाङको उत्तरी क्षेत्रमा पर्ने केपिलासगढी गाउँपालिकाको बिहिबारको बैठक सहभागी हुने र देख्नेहरु सबैलाई नौलो भयो । जहिल्यै कार्यपालिकाको बैठक कक्षको चारदिवारभित्र सम्पन्न हुने यो बैठक यसपाली भने ऐतिहाँसिक केपिलासगढीमा बस्यो ।

सोफा र कुर्सीमा बस्ने कार्यपालिकाका पदाधिकारीहरु चउरमा कोही म्याट ओछ्याएर त कोही दुवो मै गोलो घेरा बनाएर बसे ।

ग्लोबल इस्युको रुपमा विकास भइरहेको क्लाइमेट चेन्जको असर न्युनिकरण गर्नुपर्ने सन्देश दिँदै बसेको यो बैठकले केपिलासगढीको प्रमोसनको पनि उद्देश्य राखेको छ ।

कंक्रिट सिमेन्टको बन्द कोठाभित्र सोफाको सट्टा प्रकृतिको काखमा बसेर गाउँपालिकाको बैठक सञ्चालन गरिएको प्रमुख प्रशासकीय अधिकृत सौधन राई (युनिक)ले आफ्नो सामाजिक सञ्जालमार्फत जनाएका छन् ।

कार्यपालिका बैठकमा ऐतिहासिक गढी केपिलासको बारेमा पाटन संयुक्त क्याम्पसका पूर्व प्राध्यपक चतुरभक्त राईले कार्यपत्र प्रस्तुत गरेका थिए ।

बैठकमा सहभागी जनप्रतिनिधि र कर्मचारीलाई थुन्सेमा बोकेर टपरामा सेलरोटी, अचार र सुठुनी साथै किविको जुस खाजा खुवाइएको थियो ।

जलवायू परिवर्तनको असरबाट जोखिम क्षेत्रमा पर्ने यस गाउँ‌पालिकाले जलवायु असर न्यूनिकरणको लागि आफ्नो वार्षिक नीति, कार्यक्रम साथै विभिन्न गैर सरकारी संस्थासँगको सहकार्यमा कार्यक्रम सञ्चालन गर्दै आएको छ ।