८ असोज, काठमाडौं ।

राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज (आइतबार) पनि बस्दैछ । पार्टीको महाधिवेशन, आगामी निर्वाचनको रणनीति र सांगठनिक विस्तारजस्ता महत्त्वपूर्ण एजेन्डामा छलफल गर्न हिजोदेखि सुरु भएको बैठक आज दिउँसो १ बजे पुनः बस्न लागेको हो ।

पार्टी प्रवक्ता मनिष झाका अनुसार हिजोको बैठकमा ६ वटा प्रदेशका सभापति र केन्द्रीय सदस्यहरूले विभिन्न एजेन्डामाथि आफ्नो धारणा राखेका थिए । आजको बैठकमा बाँकी रहेका करिब १० जना सदस्य तथा पदाधिकारीहरूले बोल्ने क्रम जारी रहनेछ ।

“सबैले धारणा राखिसकेपछि सम्बन्धित पदाधिकारीले जवाफ दिने कार्यसूची रहेको छ,” प्रवक्ता झाले भने, “त्यसपछि अन्य तीनवटा एजेन्डामाथि छलफल सुरु हुनेछ ।”

विभिन्न सातवटा एजेन्डा तय गरेर रास्वपाको केन्द्रीय समिति बैठक शनिबारदेखि सुरु भएको हो । बैठकका मुख्य एजेन्डाहरूमा पार्टीको महाधिवेशन, बदलिँदो राजनीतिक परिस्थितिको समीक्षा, पार्टी संगठन एवं विभागहरूको पुनर्संरचना र आगामी प्रतिनिधि सभा सदस्य निर्वाचनको रणनीति रहेका छन् ।

सरकारले इलाम-२ मा आगामी फागुन २१ गतेका लागि उपनिर्वाचनको मिति तोकेको छ, जसलाई रास्वपाले विशेष महत्त्व दिएको छ । सदस्यहरूले बोल्ने क्रम सकिएपछि बैठकले पार्टीको आगामी दिशा र उपनिर्वाचनका लागि ठोस रणनीति तय गर्ने अपेक्षा गरिएको छ ।