खोटाङ, ४ जेठ । तत्कालीन प्रधानमन्त्री स्व. मनमोहन अधिकारीले २०५१ सालमा शिलान्यास गरेको महुरे–फोक्सिङटार सडक अन्ततः ३१ वर्षपछि कालोपत्रको चरणमा प्रवेश गरेको छ। आइतबार भौतिक पूर्वाधार तथा यातायातमन्त्री देवेन्द्र दाहालले शिलालेख अनावरण गर्दै कालोपत्र कार्य शुभारम्भ गर्नुभयो।

दिक्तेल–गाईघाट सडकखण्डअन्तर्गतको फोक्सिङटारदेखि महुरेसम्मको ४९ किलोमिटर खण्डलाई दुई भागमा विभाजन गरी रु ८६ करोड बजेट विनियोजन गरिएको छ। निर्माण कार्य दिव्यज्योति कन्ट्रक्सन र रायमाझी कन्ट्रक्सनले चार वर्षमा सम्पन्न गर्ने जिम्मा लिएका छन्।

कार्यक्रममा बोल्दै मन्त्री दाहालले पुल पुनःनिर्माण, गुणस्तरीय निर्माण र समयमै कार्य सम्पन्नको प्रतिबद्धता जनाउँदै जनस्तरको खबरदारी आवश्यक रहेको बताए।

यसअघि ठेकेदारको लापरबाहीका कारण काम अलपत्र परेपछि पुरानो ठेक्का रद्द गरेर नयाँ ठेकेदारमार्फत पुनः काम शुरु गरिएको हो।